MAYNILA — Arestado ang tatlong lalaki na sangkot sa pananaksak sa magkapatid sa Malabon City noong Linggo, na ikinamatay ng isa sa kanila.
Patay ang 37-anyos na si alyas “Dano”, habang sugatan ang 27-anyos niyang kapatid na si alyas “Gerald”. Ayon sa mga pulis, sinubukan nilang umawat sa rambulan sa kanilang lugar.
Sa imbestigasyon ng Malabon City police, nilusob ng tatlong lalaki at isa pang kasama ang bahay ng isang kapitbahay na sumita sa kanila habang nag-iinuman.
“Sinita sila dahil maingay, apat na oras na silang umiinom… Nairita ang mga umiinom na ito, sinundan nila ang sumita, pinigilan sila ng mga occupants,” sabi ni Malabon police chief Col. Jay Baybayan.
Nang tumulong umawat sina “Dano” at “Gerald”, sila na ang napagbalingan ng galit ng mga lasing.
May hawak na bolo ang dalawang suspek na nakipag-away sa mga biktima, batay sa cellphone video na nakuhanan ng ilang residente.
Nakita rin sa video na natumba si “Dano” nang masaksak sa likod, tagiliran, at dibdib. Agad siyang namatay, ayon sa pulis.
Dinala sa ospital si “Gerald” na sinaksak naman sa balikat.
Ayon sa mga nahuling suspek, ang kasamahan nilang nakatakas ang sumaksak sa mga biktima at napulot lang nila ang bolo sa eskinita.
Sasampahan ng kasong murder ang tatlong naarestong suspek habang pinaghahanap pa ang kanilang kasamahan.
